Firefox pśetrjebujo wótergi wjelike CPU-resurse, aby webwopśimjeśe ześěgował, pśeźěłował a zwobraznjał. Jolic maśo stawnje wusoke CPU-wuśěženje, mjaztym až wužywaśo Firefox, namakajośo w toś tom nastawku zawiny a rozwězanja za toś ten problem.

• CPU (Central Processing Unit), głowny procesor, jo „morzgi“ licadła. Gaž CPU wužywa se mimoměrnje, móžo se cełkowne wugbaśe licadła zešpatnyś.
• We wótwisnosći wót wašogo źěłowego systema móžośo CPU-pśetrjebu z wěstymi rědami kontrolěrowaś a doglědowaś. We Windowsu pokazujo rejtark Systemleistung (Systemowe wugbaśe) zastojnika nadawkow CPU-wuśěženje.

Na nejnowšu wersiju aktualizěrowaś

Nejnowša wersija Firefox wopśimujo pólěpšenja wó CPU-wuśěženju. Na nejnowšu wersiju aktualizěrowaś.

Rozšyrjenja a drastwy

Rozšyrjenja a drastwy znjemóžniś, kótarež zawinuju wusoke CPU-wuśěženje

Rozšyrjenja a drastwy mógu wustatkowaś, až Firefox wěcej CPU pśetrjebujo nježli howac.

Aby wuslěźił, lěc rozšyrjenje abo drastwa zawinujo pśewusoke CPU-wuśěženje, startujśo Firefox we wěstem modusu a wobglědujśo jogo CPU-wuśěženje. We wěstem modusu znjemóžnjaju se rozšyrjenja a drastwy, jolic pótajkim zawupytajośo radne pólěpšenje, móžośo rozšyrjenje znjemóžniś abo wótinstalěrowaś.

• Za dalšne informacije wó startowanju Firefox we wěstem modusu, aby wuslěźił, kótare rozšyrjenje abo kótara drastwa zawinujo waš problem, glejśo Problemy z rozšyrjenjami, drastwami a hardwarowym póspěšenim rozwězaś.

Mólece wopśimjeśe schowaś

Wjele webbokow ma wopśimjeśe, kótarež njetrjebaśo, ako na pś. wabjenje, kótaryž pak pśetrjebaju CPU-resurse, aby swójo wopśimjeśe zwobraznili (glejśo wótrězk Tykace dołojce). Někotare rozšyrjenja wam zmóžnjaju, mólece wopśimjeśe schowaś:

• Adblock Plus wam zmóžnja, wabjenje na websedłach schowaś.
• Flashblock wam zmóžnja, wopśimjese Flash na websedłach pó rěźe zmóžniś a znjemóžniś.
• NoScript wam zmóžnja, wše skripty zmóžniś a znjemóžniś, kótarež běže na websedłach.

Tykace

Tykace mógu wjelgin wjele CPU pśetrjebowaś, aby swóje wósebne wopśimjeśa zwobraznili, pśedewšym starše wersije.

Waše tykace aktualizěrowaś

Aby kontrolěrował, lěc maśo nejnowše wersije wšych swójich tykacow, źiśo k našomu bokoju Pśespytajśo swóje tykace.

Tykace znjemóžniś, kótarež pśetrjebuju CPU

Móžośo zwěsćiś, lěc jadyn z wašych tykacow zawinujo wusoke CPU-wuśěženje, gaž jen znjemóžnjaśo:

Za tym až sćo někotare ze swójich tykacow znjemóžnił, zacyńśo Firefox a startujśo jen znowego a wobglědujśo jogo CPU-wuśěženje. Jolic njewiźiśo pólěpšenje, móžośo toś te tykace zasej zmóžniś a drugi wuběrk tykacow znjemóžniś.

Jolic wiźiśo pólěpšenje pśi CPU-wužywanju, za tym až sćo wěsty tykac znjemóžnił, móžośo jen znjemóžnjony wóstajiś. Jolic ten tykac jo w interneśe daloko rozšyrjony, wopytujśo alternatiwny tykac namakaś, kótaryž ma niše CPU-wuśěženje.

Hardwarowe póspěšenje Flash pśeglědowaś

Za wěste tykace, kótarež wótgrawaju wideo ako Flash, zwobraznjujo se wopśimjeśe na połnej wobrazowce, což dajo se pśez hardwaru póspěšyś. Pśez to CPU-wuśěženje se zniža.

1. Nawigěrujśo k bokoju, kótaryž pokazujo wideo Flash.
2. Klikniśo z pšaweju tastuŹaržćo tastu Strg tłoconu, mjaztym až na wideowótgrawak kliknjośo a klikniśo pótom na Einstellungen… w kontekstowem meniju. Nastajenja wótgrawaka Adobe Flash se wócyniju.
3. Klikniśo na symbol dołojce nalěwo we woknje nastajenjow wótgrawaka Adobe Flash, aby wótrězk Anzeige wócynił.
4. Kontrolěrujśo, lěc nastajenje Hardwarebeschleunigung aktivieren jo wubrane.
5. Klikniśo na Schließen, aby wokno nastajenjow wótgrawaka Adobe Flash zacynił.

Hardwarowe póspěšenje Firefox pśeglědowaś

Hardwarowe póspěšenje Firefox zniža CPU-wuśěženje.

Kontrolěrujśo, lěc hardwarowe póspěšenje jo zmóžnjone a waše grafikowe gónjaki su aktualne.

Bazěrujo na informacijach z nastawka Firefox CPU usage (mozillaZine KB)