Je Firefox waše přizjewjenja składował? Je tute websydło je składowało? Kak móžeće kontrolować, štož su přizjewjenja awtomatisce na websydłach zapodali? Wujasnjamy wam, kak móžeće swoje přizjewjenja składować, zo byšće móhł kontrolować, štož so awtomatisce stawa.

Kak spóznawaće, hdźež so waše přizjewjenje składuje

Waše přizjewjenja so w zrjadowaku hesłow Firefox abo w plackach składuja.

Zrjadowak hesłow Firefox wužiwarske mjena a hesła wěsće składuje, kotrež wužiwaće, zo byšće přistup k websydłam dóstał a zapisuje je awtomatisce, hdyž websydła přichodny raz wopytujeće.

Hdyž wužiwarske mjeno a hesło za websydło zapodawaće, kotrejž Firefox hišće njeje składował, so dialog „Hesło składować“ wočinja, zo by was so prašał, hač chceće jej składować. Hdyž na „Hesło składować“ kliknjeće, Firefox was přichodny raz, hdyž websydło wopytujeće, awtomatisce pola tutoho websydła přizjewi.

Plack je informacija, kotruž websydło na wašim ličaku składuje. Někotre websydła waše přizjewjenske informacije w plackach składuja.

Hdyž websydło wopytujeće a kontrolny kašćik widźiće, kotryž tekst „Spomjatkować sej“ abo něšto podobne pokazuje, budźe websydło waše přizjewjenske informacije, kaž na přikład waše wužiwarske mjeno a hesło abo jenož waše wužiwarske mjeno, w placku składować. Přichodny raz, hdyž websydło wopytujeće, budźe waš ličak waš přizjewjenski plack wróćo k websydłu słać, a přizjewjeće so awtomatisce abo dóstanjeće namołwu, waše hesło, ale nic wužiwarske mjeno, zapodać, zo byšće so přizjewił.

Pro a kontra wo składowanju wašich přizjewjenjow w zrjadowaku hesłow a plackach

Zrjadowak hesłow Firefox

Jedna lěpšina wužiwanja zrjadowaka hesłow Firefox je, zo so wšě waše přizjewjenja - wužiwarske mjena a hesła - na jednym městnje składuja. Móžeće swoje přizjewjenja w zrjadowaku hesłow Firefox namakać a njetrjebaće so bojeć, zo zabywaće, hdźež su.

Z druheje strony móže riskantnje być, wšě waše přizjewjenja nješkitane na jednym městnje składować. Teoretisce móhł něchtó, kotryž ma přistup k wašemu ličakej waš zrjadowak hesłow Firefox wočinić a sej waše přizjewjenja wobhladać a pola Amazon nakupować! Na zbožo Firefox wam zmóžnja, hłowne hesło wužiwać, zo by druhim wužiwarjam přistup k wašim přizjewjenjam bjez wašeje dowolnosće wobarał.

Placki

Lěpšina, placki wužiwać, je, zo móžeće pola websydła přizjewjeny wostać, tak zo móžeće přizjewjensku stronu přeskočić a so spěšnje tam dóstać, hdźež chceće. Placki Facebook a Twitter to wam zmóžnjeja, na přikład.

Jedna njelěpšina, placki wužiwać, je, zo waše přizjewjenske informacije zhubjeja, hdyžkuli placki swojeho ličaka hašeće a prufowak wuprozdnjeće. To móhło so zmylnje stać, jeli pospytujeće, problem mjez wašim ličakom a websydłom rozrisać. Potom dyrbiće swoje přizjewjenske informacije znowa zapodać, hdyž swoje najlubše websydła přichodny raz wopytujeće.

Strategije za składowanje wašich přizjewjenskich informacijow

Sady wužiwać, zo bychu so lochko spomjatkujomne hesła wutworili

Jeli chceće najwěsćišu metodu za składowanje swojich přizjewjenskich informacijiw, měł wy so na swój pomjatk spušćić. To je lóše hač sej mysliće. Wubjerće rozdźělne přizjewjenje za kóžde websydło a zašćěpće sej je. Hlejće Mócne hesło wubrać za podrobnosće.

Zrjadowak hesłow a hłowne hesło wužiwać

Trjebaće snano pomoc při spomjatkowanju tutych přizjewjenjow. Druha wěstota metoda je, zo rozdźělne přizjewjenje za kóžde websydło wužiwaće, je w zrjadowaku hesłow składujeće, hdyž namołwu dóstawaće, a potom wšitko z hłownym hesłom zawěsćeće.

Zrjadowak hesłow bjez hłowneho hesła wužiwać

Snano je riziko małe, zo něchtó druhi websydła z wašimi přizjewjenjemi wopytuje - waš ličak dom njewopušća, je z wěstej syću zwjazany a ludźo, kotřiž jón wužiwaja, su dowěry hódni. W tutym padźe móžeće prosće rozdźělne přizjewjenje za kóžde websydło wubrać, tute přizjewjenja w zrjadowaku hesłow składować a so hłowneho hesła wzdać.

Waše přizjewjenja w zrjadowaku hesłow kaž tež w plackach składować

Snano jenož prosće za spěšnosću pytaće - chceće te přizjewjenske strony přeskočić, kotrež hewak dyrbjał wjacekróc wob dźeń wopytać. Jeli waš ličak je we wěstych rukach a websydła jenož niske riziko maće (nic z kreditnej kartu zwjazane), móžeće swoje přizjewjenja w zrjadowaku hesłow a w plackach składować.

Kak móžeće swoje přizjewjenja rjadować

Jeli byšće rady swoje wužiwarske mjena, hesła abo placki zhašał, móžeće to lochko činić a tu su dwaj nastawkaj, kotrejž wam pokazujetej, kak móžeće to činić:

• Password manager - Remember, delete, change and import saved passwords in Firefox
• Placki zhašeć, zo byšće daty wotstronił, kotrež websydła su na wašim ličaku składowali

Přidatne programy za rjadowanje hesłow

Tu su někotre programy za rjadowanje hesłow, kotrež maja wosebite funkcije a funguja z wjacorymi wobhladowakami, dźěłowymi systemami a mobilnymi gratami:

RoboForm dospołnje zapodaće hesłow a wupjelnjenje formularow z jednym kliknjenjom awtomatizuje, štož je jara eficientne za předewzaća a jich přistajenych.

1Password wurjadnje funguje ze wšěmi wobhladowakami a składuje wjace hač jenož hesła, na přikład tež čisła kreditnych kartow, bankowe daty, softwarowe licency a informacije wo identiće wužiwarjow.

Lastpass je darmotny a je za nimale kóždu ličakowu platformu k dispoziciji, inkluziwnje mobilne graty.