Hdyž websydło, kotrež wěsty zwisk (HTTPS) trjeba, pospytuje z wašim ličakom komunikowa, přepruwuje Firefox tutón pospyt, zo by zawěsćił, hač certifikat websydła a zwjazowanska metoda stej woprawdźe wěstej. Jeli Firefox njemóže wěsty zwisk nawjazać, pokazuje zdźělenku, kotraž zwjetša woznamjenja:

• Firefox njemóže wěstotny certifikat sydła přepruwować abo
• Něšto na wašim ličaku abo we wašej syći wěsty zwisk blokuje abo wuměnja abo
• Problem je z websydłom.

Tutón nastawk wujasnja, čehodla zmylkowu stronu za wěsty zwisk abo wěstotne warnowanje a štož móžeće z tym činić.

Wěsty zwisk móžny njeje

Zmylkowa strona Wěsty zwisk móžny njeje budźe wopisanje zmylka a tłóčatko Hišće raz spytać wobsahować. Njeje móžnosć, wěstotne wuwzaće přidać, z kotrymž so móžeće tutomu zmylkowemu typej wuhibać.

Zmylkowa strona tež slědowace informacije wobsahuje:

• Strona, kotruž pospytujeće sej wobhladać, njeda so pokazać, dokelž awtentiskosć přijatych datow njeda so přepruwować.
• Prošu stajće so z wobsedźerjemi websydła do zwiska, zo byšće jich wo tutym problemje informował.

TLS-wersija so njepodpěruje

Někotre websydła pospytuja, zestarjene (hižo njewěste) mechanizmy Transport Layer Security (TLS) wužiwać, zo bychu waš zwisk zawěsćili. Firefox was při nawigowanju k tajkim sydłam haći, zo by was škitał, jeli je problem, wěsty zwisk nawjazać. Stajće so z websedźerjemi websydła do zwiska a prošće jich, jich TLS-wersiju na wersiju aktualizować, kotraž je aktualna a wěsta.

TLS 1.2 je minimalna po standardźe dowolena TLS-wersija. Websydła, kotrež TLS-wersiju 1.2 abo nowšu njepodpěruja, zmylkowu stronu Wěsty zwisk móžny njeje ze zmylkowym kodom SSL_ERROR_UNSUPPORTED_VERSION pokazuja, a zdźělenku, kotraž praji: Tute websydło snano protokol TLS 1.2 njepodpěruje, kotryž je minimalna wersija, kotruž Firefox podpěruje. Za dalše informacije hlejće tutón blogowy přinošk Mozilla a Transport Layer Security (MDN Web Docs).

Njeje so zwjazało: Potencielny wěstotny problem

Wěste zmylki z wěstymi zwiskami k zmylkowej stronje Njeje so zwjazało: Potencielny wěstotny problem wjedu.

Zmylkowa strona wopisanje potencielneho wohroženja wěstoty a tłóčatko Rozšěrjeny… wobsahuje, z kotrymž móžeće sej zmylkowy kod a druhe techniske podrobnosće wobhladać. Njeje móžnosć, wěstotne wuwzaće přidać, zo byšće websydło wopytał.

Websydła snano HTTP Strict Transport Security (HSTS) trjebaja a njebudu přistup z njewěstym zwiskom dowoleć.

Warnowanje: Potencielne wěstotne riziko prědku

Firefox wěstotny certifikat websydła přepruwuje, zo by zaručił, zo sydło je legitimne a zo waš zwisk je zaklučowany. Jeli certifikat njeda so přepruwować, Firefox zwisk přetorhnje a pokazuje stronu Warnowanje: Potencielne wěstotne roziko prědku.

Klikńće na tłóčatko Rozšěrjeny…, zo byšće sej zmylkowy kod a přidatne informacije wobhladał. Wotwisujo wot zmylka, móžeće so warnowanju wuhibać a sydło wopytać. Zo byšće wjace zhonił, hlejće Što „Waš zwisk wěsty njeje“ woznamjenja? a Problemy z wěstotnymi zmylkowymi kodami na wěstych websydłach rozrisać.

Tutón zmylk so snano přez wěstotnu software abo syćowe nastroje zawinuje, kotrež wěste zwiski po standardźe wotposkuja.

Móžne rozrisanja

• Hdyž antiwirusowu wěstotnu software aktualizujeće abo jich nastajenja změniće dadźa so problemy rozrisać, kotrež softwarowe produkty zawinuja, kotrež zaklučowane zwiski skenuja. Na Windows móžeće software swojeho třećeho poskićowarja wotinstalować a zatwarjeny Windows-Sicherheit mit Microsoft Defender Antivirus wužiwać.
• Wopak nastajeny systemowy časnik móže zawinować, za Firefox wotkrywa, zo wěstotny certifikat websydła je spadnył abo njepłaćiwy. Zawěsćće, zo waš ličak je na korektny datum, čas a časowe pasmo nastajeny. Hlejće Na čas poćahowane zmylki na wěstych websydłach porjedźić.
• Přepruwujće, hač websydło funguje. Jeli websydło so do Firefox njezačita, problem snano na sydle leži.
• Spytajće samsne sydło w druhim wobhladowaku wočinić. Jeli so najebać to njezačita, problemy najskerje na sydle leža.
• Zhašejće pufrowane certifikaty w Firefox. Jeli Firefox je zestarjeny abo dowěry njehódny certifikat składował, je móžno, zo so problem rozrisuje, hdyž certifikat wotstronjeće. Klikńće w menijowej lajsće horjeka na wobrazowce na Firefox a wubjerće Nastajenja, (na staršich wersijach macOS Nastajenja).Klikńće na menijowe tłóčatko a wubjerće Nastajenja. Dźiće k woknu Priwatnosć a wěstota, potom dele k wotrězkej Certifikaty, klikńće na Certifikaty pokazać…, wubjerće dowěry njehódne abo zestarjene sydłowe certifikaty a klikńće na Zhašeć abo dowěru zebrać…

Podobne nastawki

• Certificate contains the same serial number as another certificate
• Websites look wrong or appear differently than they should
• Websydła so nječituja - problemy rozrisać a zmylkowe zdźělenki porjedźić