Tutón nastawk hłowne wokno Thunderbird za Thunderbird 115 Supernova a nowše wersije wopisuje.

Je wjele móžnosćow hłowne wokno Thunderbird konfigurować. Tutón nastawk dwě woblubowanej konfiguraciji wopisuje:

• Wuhotowanje klasiskeho napohlada za wobłuk lisćiny powěsćow
• Wuhotowanje wertikalneho napohlada z kartowym napohladom za wobłuk lisćiny powěsćow

Čitajće tež wjele tastowych skrótšenkow, kotrež su we hłownym woknje k dispoziciji, zo by wam pomhali, funkcije spěšnje wuwjesć, na přikład akcije powěsćow a nawigaciju kaž tež pytanske a protykowe akcije.

Wuhotowanje klasiskeho napohlada z tabelowym napohladom

Slědowace foto wobrazowki wuhotowanje klasiskeho napohlada z tabelowym napohladom pokazuje. Zo byšće tutón napohlad widźał:

1. Wubjerće „Klasiski napohlad“ kaž slěduje: Klikńće na ≡ > Napohlad > Wuhotowanje > Klasiski napohlad a
2. Jeli „Hłowowa linka lisćiny powěsćow“ (čo. 4 we foće wobrazowki) widźomna njeje, klikńće na ≡ > Napohlad > Wuhotowanje > Hłowowa linka lisćiny powěsćow a
3. Wubjerće „Tabelowy napohlad“: (naprawo pódla Spěšny filter) Klikńće na symbol „Pokazowanske nastajenja za powěsćowu lisćinu“ > Tabelowy napohlad

1. Lajsta dźělnych programow

Wot wersije 102 ma Thunderbird centralnu symbolowu lajstu dźělnych programow za spěšny a lochki přistup k wašim najwažnišim aktiwitam. Klikńće na tłóčatka, zo byšće so mjez wšelakimi „dźělnymi programami“ pohibował: e-mejl, adresnik, protyka, nadawki, chat a waše přidatki. Deleka na lajsće dźělnych programow je tłóčatko, z kotrymž móžeće lajsty dźělnych programow schować. Nad tym je tłóčatko, z kotrymž móžeće nastajenja změnić. Za dalše podrobnosće hlejće New in Thunderbird 102.

2. Zjednoćena symbolowa lajsta

Je nowa „zjednoćena symbolowa lajsta“ nad lajstu rajtarkow, kotraž je połnje přistupna za čitak wobrazowki a tastaturu. Tuta symbolowa lajsta so za wšě „dźělne programy“ lajsty dźělnych programow wužiwa, ke kotrymž e-mejl, adresnik, protyka, nadawki, chat a nastajenja słušeja. Za dalše podrobnosće hlejće Unified Toolbar.

3. Lajsta rajtarkow

W Supernova so lajsta rajtarkow jenož pokazuje, hdyž dwaj rajtarkaj abo wjace rajtarkow maće. Jeli na přikład rajtark E-mejl a rajtark Protyka maće, je lajsta rajtarkow widźomna. Jeli jenož jedyn rajtark kaž na přikład rajtark E-mejl maće, so lajsta rajtarkow awtomatisce zhubi.

4. Hłowa powěsćoweje lisćiny

Hłowa powěsćoweje lisćiny je nowa za 115. Pokazuje aktualne mjeno rjadowaka, ličbu powěsćow, tłóčatko „Spěšny filter“ a symbol „Pokazowanske nastajenja za powěsćowu lisćinu“ . Jeli hłowu pokazoweje lisćiny njewidźiće, klikńće na ≡ > Napohlad > Wuhotowanje > Hłowa powěsćoweje lisćiny.

5. Wobłuk rjadowakow

We wobłuku rjadowakow so waše konta a rjadowaki jewja. Pokazuje mjena kontow, kotrež su we woknje kontowych nastajenjow podate, jako prěnje standardne konto a přidatne konta so po porjedźe, po kotrymž sće je přidał, nalistuja. Jeli hłowu powěsćoweje lisćiny njewidźiće, klikńće ≡ > Napohlad > Wuhotowanje > Wobłuk rjadowakow.

Z kóždym kontom so wosebite rjadowaki (Dochadna e-mejl, Pósłany, Papjernik) so jako prěnje z jónkróćnymi symbolemi nalistuja, mjeztym zo so druhe rjadowaki w alfabetiskim porjedźe jewja.

Podrjadowaki so pod nadrjadowanym rjadowakom jewja. Zo byšće kontowy abo nadrjadowany rjadowak pokazał abo schował, klikńće na šipk pódla kontoweho abo nadrjadowaneho rjadowaka abo klikńće dwójce na mjeno.

Móžeće swoje preferowane napohlady wobłuka rjadowakow wubrać.

6. Lajsta spěšnych filtrow

Lajsta spěšnych filtrow wam pomha, wašu powěsćowu lisćinu na zakładźe wěstych kriterijow sortěrować. Hlejće Lajsta spěšnych filtrow.

7. Wobłuk lisćiny powěsćow

W tabelowym napohledźe wobłuk powěsćoweje lisćiny lisćinu powěsćow wubraneho rjadowaka jako špalty pokazuje, z podrobnosćemi kaž datum/čas, tema, wotpósłar a wjace. Zo byšće podrobnosće wubrał, kotrež so maja pokazać, a widźał, kak šěroka kóžda špalta je, hlejće Message List Columns. Zo byšće ke kartowemu napohladej přešoł, klikńće na symbol „Pokazowanske nastajenja za powěsćowu lisćinu“ > Kartowy napohlad.

8. Wobłuk hłowoweje linki powěsćow

Wobłuk hłowoweje linki (direktnje nad wobłukom powěsćow) wam informacije wo wubranej powěsći pokazuje, na přikład hłowowe linki Wot, Komu a Tema kaž tež datum/čas powěsće.

Móžeće tež akcije za powěsć wuwjesć, na přikład wotmołwić, dale sposrědkować, archiwować, jako čapor abo přečitanu markěrować a zhašeć.

Dalše akcije su pod šipkom dele (↓), na přikład dale sposrědkować, značka, jako přečitany markěrować, składować, ćišćeć, do podawka abo nadawka konwertować, žórłowy tekst pokazać, tekstowe kodowanje reparować a powěsćowy wobsah. Poslednja akcija je Přiměrić…, zo byšće nastajenja hłowoweje linki přiměrił a hdźež móžeće wubrać, kak so ma hłowowa linka powěsće pokazać.

Klikńće na awtar pódla kontakta, zo byšće swojemu adresnikej tu wosobu přidał a awatar so womódri. Jeli kontakt je we wašim adresniku budźe awatar módry a móžeće zapis adresnika wobdźěłać abo zhašeć.

9. Wobłuk powěsćow

We wobłuku powěsćow widźiće wobsah wubraneje powěsće. Zo byšće wobłuk powěsćow pokazał/schował, tłóčće F8 abo klikńće na ≡ > Napohlad > Wuhotowanje > Wobłuk powěsćow.

10. Dźensniši plan

Dźensniši plan informacije z wašeje protyki pokazuje, na přikład za dźensnišeho a za jutřišeho planowane podawki a tež přichodne podawki (po standardźe za přichodne 5 dnjow). Klikńće na šipkaj horjeka w dźensnišim planje, zo byšće napohlad Podawki a nadawki přepinał, kotryž nadawki a podawki wašeje protyki wobsahuje, abo napohlad Nadawki, kotryž jenož nadawki wašeje protyki wobsahuje, nic podawki.

Zo byšće dźensniši plan schował, klikńće na X pódla šipkow. Zo byšće jón zaso pokazał, klikńće na Dźensniši plan w statusowej lajsće. Móžeće tež tastu F11 tłóčić, zo byšće dźensniši plan pokazał/schował.

11. Statusowa lajsta

Statusowa lajsta wotlěwa doprawa:

• Tłóčatko, zo byšće wot online do offline tam a sem a nawopak přepinał.
• Wobłuk, kotryž statusowe zdźělenki wo operacijach kaž sćehnjenje mejlkow, zhusćenje rjadowakow atd. pokazuje.
• Tłóčatko, kotrež mjez pokazowanjom „dźensnišeho plana“ a jeho chowanjom přepina.

Cil je, zo so ma w běhu časa statusowa lajsta wotstronić a so jeje funkcije do po konteksće relewantnych městnow přesuwaja. Ličba nječitanych powěsćow a powěsćow dohromady, kotrež zwjetša běchu w statusowej lajsće we wersijach před Supernova, su so do jednotliwych rjadowakow přesunyli.

Wuhotowanje wertikalneho napohlada z kartowym napohladom

Slědowace foto wobrazowki wuhotowanje wertikalneho napohlada z kartowym napohladom pokazuje. Zo byšće tutón napohlad widźał:

1. Wubjerće „Wertikalny napohlad“ kaž slěduje: Klikńće na ≡ > Napohlad > Wuhotowanje > Wertikalny napohlad a
2. Jeli „hłowa powěsćoweje lisćiny“ (čo. 4 w foće wobrazowki) widźomna njeje, klikńće na ≡ > Napohlad > Wuhotowanje > Hłowa powěsćoweje lisćiny a
3. Wubjerće „kartowy napohlad“: (naprawo pódla tłóčatka Spěšny filter) Klikńće na symbol „Pokazowanske nastajenja za powěsćowu lisćinu“ > Kartowy napohlad.

Tuta konfiguracija ma najwjace komponentow ze samsnymi funkcijemi kaž jich pendanty we „wuhotowanju klasiskeho napohlada z tabelowym napohladom“:

• 1. Lajsta dźělnych programow
• 2. Zjednoćena symbolowa lajsta
• 3. Lajsta rajtarkow
• 4. Hłowowa linka lisćiny powěsćow
• 5. Wobłuk rjadowakow
• 6. Lajsta spěšnych filtrow
• 7. Wobłuk lisćiny powěsćow
• 8. Wobłuk powěsćow
• 9. Dźensniši plan
• 10. Statusowa lajsta
• 11. Jedna z kartow w kartowym napohledźe

Kartowy napohlad (jedna z kartow je čerwjena wuzběhnjena, hlejće čo. 11), je wjacelinkowy, bjezšpaltowy alternatiwny napohlad powěsćoweje lisćiny. Wersija 115 ma dwě linkowej „karće“ za kóždu powěsć we wobłuku powěsćoweje lisćiny. Prěnja linka ma pokazowanske mjeno wotpósłarja (nic woprawdźitu e-mejlowu adresu), čas a horjeka naprawo meni Powěsćowe akcije, ⋮ (tež znaty jako kebabowy meni, dokelž 3 wertikalne dypki su na kebab podobne). Druha linka temu pokazuje.

Wersija 128 a nowše maja třilinkowu „kartu“ za kóždu powěsć we wobłuku powěsćoweje lisćiny. Třeća linka informacije wo powěsćowej nitce přidawa (jeli je wjace hač jedna powěsć w nitce), znački a hwězdny status.