Dataje AutoConfig dadźa so wužiwać, zo bychu nastajenja postajili a zawrěli, kotrež skupinske směrnicy Firefox njewopřijimaja.
Zo byšće AutoConfig wužiwał, stajće dwě dataji do rjadowakow Firefox. Na Windows wobě do samsneho zapisa słušatej, hdźež Firefox je zainstalowany. Na macOS słušatej do zapisa Contents/Resources nałoženja Firefox.app.
Prěnja dataja, kotruž dyrbiće wutworić, autoconfig.js rěka a składuje so do rjadowaka defaults/pref. Wona měła slědowacej dwě lince wobsahować:
pref("general.config.filename", "firefox.cfg");
pref("general.config.obscure_value", 0);
Prěnja linka mjeno dataje AutoConfig podawa. Móžeće někajke mjeno podać, ale městno dataje njeda so změnić.
Druha linka podawa, zo nochceće, zo ma so AutoConfig zatajić. Po standardźe Firefox wočakuje, zo dataja je wo 13 bajtow přesunjena, zo by so wobsah zawodźěł.
Druha dataja, kotruž dyrbiće wutworić, firefox.cfg rěka a składuje so na najwyšej runinje.
Wona měła so přeco z komentarowej linku započeć:
// IMPORTANT: Start your code on the 2nd line
Hačrunjež kóncowka dataje AutoConfig je zwjetša cfg, je dataja AutoConfig sama dataja JavaScript. To rěka, zo móžeće JavaScript do dataje pisać, zo byšće rozdźělnu logiku w rozdźělnych situacijach wužiwał.
Slědowace funkcije su w dataji AutoConfig k dispoziciji:
pref(prefName, value) – postaja wužiwarsku hódnotu nastajenja. Tuta funkcija nastajenje eksplicitnje jako wužiwarske nastajenje postaja. To rěka, zo, jeli wužiwar je hódnotu změnił, wona so kóždy raz wróćo staja, hdyž so wobhladowak startuje.
defaultPref(prefName, value) – postaja standardnu hódnotu nastajenja. To je hódnota, kotruž nastajenje ma, hdyž wužiwar njeje hódnotu nastajił.
lockPref(prefName, value) – postaja standardnu hódnotu nastajenja a zawěra ju. To je funkcija, kotraž je najwjace ludźom znata, hdyž chcedźa z datajemi AutoConfig dźěłać. Zawěranje nastajenja zadźěwa tomu, zo wužiwar jo měnja, a w najwjace padach so wužiwarski powjerch w nastajenjach znjemóžnja, tak zo je wužiwarjej jasnje, zo nastajenje je znjemóžnjene. W padach, hdyž ničo znjemóžnjene w nastajenjach njewidźiće, su někotre nastajenja „disable_button“, kotrež tłóčatka znjemóžnjeće, hdyž su zawrjene. Jeli na přikład nastajenje
pref.privacy.disable_button.view_passwords
zawěraće, so tłóčatko „Hesła pokazać“ znjemóžni. Druhe nastajenja, kotrež tłóčatka znjemóžnjeja, su:
pref.general.disable_button.default_browser pref.browser.homepage.disable_button.current_page pref.browser.homepage.disable_button.bookmark_page pref.browser.homepage.disable_button.restore_default security.disable_button.openCertManager security.disable_button.openDeviceManager app.update.disable_button.showUpdateHistory pref.privacy.disable_button.cookie_exceptions pref.privacy.disable_button.view_cookies pref.privacy.disable_button.view_passwords pref.privacy.disable_button.view_passwords_exceptions pref.downloads.disable_button.edit_actions.
unlockPref(prefName) – wotewěra nastajenje. Su snano pady, hdźež nastajenje za wšěch zawěraće a jo za jednotliweho wužiwarja wotewěraće.
getPref(prefName) – wotwołuje hódnotu nastajenja. Jeli nastajenje njeeksistuje, so zmylk pokaza. Wužiwajće to jenož, hdyž wěsće, zo nastajenja eksistuja.
clearPref(prefName) – wotstronja wužiwarsku hódnotu nastajenja a staja jo na jeho standardnu hódnotu.
displayError(funcname, message) – pokazuje zmylk we wěstym formaće.
Netscape.cfg/AutoConfig failed. Please contact your system administrator. Error: [funcname] failed: [message]
To je praktiske za pytanje zmylkow.
getenv(name) – zmóžnja wam, wokolinowe wariable wotprašować. To wam na přikład zmóžnja, wužiwarske mjena a druhe systemowe informacije wotwołować.
Jeli chceće swoju dataju AutoConfig centralnje rjadować, móžeće městno sekundarneje dataje AutoConfig w primarnej dataji AutoConfig podać:
pref("autoadmin.global_config_url","http://yourdomain.com/autoconfigfile.js");
URL móže kóždy protokol być, kotryž so přez Firefox podpěruje. K tomu file-protokol słuša: protokol, kotryž na dataju na syćowym běhadle pokazuje. Format zdaleneje dataje autoconfig je samsna kaž dataja autoconfig na klienće, jenož zo prěnja linka so njeignoruje.
Jeli chceće informacije w swojej konfiguraciji měć, kotrež su specifiske za wužiwarja, móžeće druhe nastajenje postajić:
pref("autoadmin.append_emailaddr", true);
To prašak (?) připowěša a e-mejlowu adresu za naprašowanje.
Dźiwaće so snano tomu, zwotkelž ta e-mejlowa adresa přińdźe. Dokelž Firefox e-mejlowe adresy njewužiwa, dyrbiće ju nastajić. Jeli to nječiniće, budźe so was Firefox za e-mejlowej adresu prašeć. Nastajenje mail.identity.useremail rěka a je nastajenje typa znamješko. Dokelž dataja autoconfig je javaskriptowa dataja, móžeće tute nastajenje postajić, prjedy hač autoadmin.global_config_url postajeće, na přikład
var user = getenv("USER"); lockPref("mail.identity.useremail", user); lockPref("autoadmin.global_config_url","http://yourdomain.com/autoconfigfile.js");
Su někotre druhe nastajenja, kotrež aspekty AutoConfig wodźa. autoadmin.refresh_interval AutoConfig po datym interwalu w mjeńšinach aktualizuje. Su tež někotre nastajenja nastupajo to, kak so z offline wobchadźa, mjez nimi autoadmin.offline_failover a autoadmin.failover_to_cached. Takle funguja:
Kóždy raz, hdyž so dataja AutoConfig zdaloka wotwołuje, so zawěsćenska kopija teje dataje w profilowym rjadowaku wužiwarja wutworja, kotraž failover.jsc rěka. Jeli nastajenje autoadmin.failover_to_cached je na false stajene, Firefox pufrowanu dataju čita a markuje potom wobhladowak jako offline a zawěra nastajenje, zo njeby wužiwar online šoł. Jeli nastajenje je na true stajene, wužiwa prosće pufrowanu dataju a pokročuje. Nastajenje autoadmin.offline_failover wodźi, hač pufrowana dataja so wužiwa abo nic, hdyž wužiwar je prosće offline. Jeli na true stajene, so pufrowana dataja wužiwa.
