Disa sajte e ndjekin sjelljen tonë në Internet, për ta bërë më të personalizuar punimin tonë në Internet. Nëse nuk jemi të kujdesshëm, kjo mund të na vërë në rrezik, pasi të dhënat tona mund të hapen dhe përdoren nga palë të treta, pa dijeninë tonë.
Nuk ka pse të sakrifikoni privatësinë sa herë që punoni në Internet. Ja disa ndihmëza për t’ju ndihmuar të kontrolloni cilat të dhëna ruhen, gjurmohen apo ndahen me të tjerët.
Mos Më Gjurmo: Thuajuni sajteve të reshtin gjurmimin tuaj
Veçoria Mos Më Gjurmo u thotë sajteve - dhe rrjeteve të tyre - se nuk doni që sjellja juaj në Internet të gjurmohet dhe të dhënat e përftuara prej kësaj të ndahen me të tjerë. Mozilla po ndihmon gjithnjë e më tepër kompani të sendërtojnë veçorinë Mos Më Gjurmo.
Mos Më Gjurmo mund të kihet te Firefox-i për desktop, Firefox-i për Android dhe Firefox OS-i.
Shfletim Privat: Mos ruani regjistrim të veprimtarisë suaj në Internet
Kur përdorni një kompjuter bashkë me persona të tjerë, ndiqni këto ndihmëza që të dhënat tuaja, të tilla si historik shfletimi dhe kredenciale hyrjesh nëpër llogarira, të jenë private:
- Përdorni mënyrën Shfletim Privat që të parandaloni ruajtjen në kompjuter dhe përdorimin nga të tjerët të historikut tuaj të shfletimit, parapëlqime sajtesh dhe kredenciale hyrjesh. Shfletimi Privat bllokon gjithashtu cookies, duke penguar mashtrues dhe përgjues të ndjekin veprimtarinë tuaj nëpër sajte.
- Nëse harroni të përdorni mënyrën Shfletim Privat në një kompjuter të përbashkët, mos u shqetësoni. Mundeni të përdorni butonin Harroje për të fshirë shpejt e shpejt të dhënat tuaja më të freskëta pa prekur gjërat e tjera.
Lightbeam: Shihni se kush ju vëzhgon
Kur vizitoni një sajt, a e dini se sa kompanive po u jepni të dhëna nga tuaja?
Lightbeam është një shtesë Mozilla që ju tregon se me sa kompani është lidhur shfletuesi juaj, teksa shfletoni në Internet. Njohja e kësaj ju lejon të merrni vendime të peshuara lidhur me veprimtarinë tuaj në Internet.
Vizitoni faqen e Lightbeam-it që të instaloni shtesën dhe të hidhni një rreze drite mbi ata që ju vëzhgojnë.
Më tepër shtesa privatësie
Mundësitë tuaja nuk mbarojnë këtu. Për Firefox-in ka mijëra shtesa të gatshme për të mbrojtur privatësinë tuaj! Zgjidhni prej shtesash që bllokojnë reklama apo gjurmues, e deri te të tilla që u parandalojnë motorëve të kërkimit të modifikojnë përfundimet e kërkimeve tuaja.
Shihni koleksionin Shtesa Privatësie.