Bok nowego rejtarika Firefox zwězanja (sedła, ku kótarymž se cesto woglědujośo), woblubowane nastawki na Pocket a waše njedawno woglědane abo ako cytańske znamjenja skłaźone sedła. Móžośo toś to wopśimjeśe pśiměriś, gaž slědujucym instrukcijam slědujośo.

Kachlicki, kótarež se we wótrězkach Zwězanja (nejcesćej woglědane sedła), Wót Pocket dopórucony a Nejnowša aktiwita (sedła, ku kótarymž su se njedawno woglědali abo ako cytańske znamje składowali) boka nowego rejtariki pokazuju, se na zakłaźe pśeglědowańskego zaźaržanja změnjaju, ale móžośo zwězanja pśipěś abo toś te kachlicki wótwónoźeś.

Waše zwězanja pśiměriś

Waše zwězanja su sedła, ku kótarymž se cesto woglědujośo a sedła, kótarež cośo za lažčejšy pśistup pśipěś. Toś te sedła se teke zjawiju, gaž do adresowego póla klikaśo, aby pytanje zachopił.

1. Gibniśo špěrku myški nad zwězanje.

   

2. Klikniśo na tśidypkowy meni, kótaryž se górjejce napšawo na zwězanju zjawijo.
3. Wubjeŕśo tam, lěc cośo zwězanje pśipěś, wobźěłaś abo zachyśiś (wótwónoźeś).

Zwězanje pśidaś

Jolic proznu kachlicku maśo:

1. Gibniśo špěrku myški nad proznu kachlicku a klikniśo na Toś to sedło wobźěłaś (pisakowy symbol).

   

2. Zapódajśo titel a URL (webadresu) za sedło a klikniśo na Pśidaś.
3. Kachlicka ze symbolom sedła se we wašych zwězanjach zjawijo.

Jolic proznu kachlicku njamaśo: Móžośo eksistěrujuce zwězanje wobźěłaś, aby nowy titel a URL pokazał.

1. Gibniśo špěrku myški nad eksistěrujuce zwězanje, kótarež wěcej njetrjebaśo.
2. Klikniśo na tśidypkowy meni, kótaryž se górjejce napšawo w zwězanju pokazujo a wubjeŕśo Wobźěłaś.

   

3. Zapódajśo nowy titel a URL w dialogu Zwězanje wobźěłaś, kótaryž se wócynja a klikniśo na Składowaś.

Zwězanje pśipěś, wótpěś abo wótwónoźeś

Zwězanje pśipěś:

1. Gibniśo špěrku nad kachlicku, daniž se meni (tśi dypki) njepokazujo.

   

2. Klikniśo na Pśipěś.
3. Symbol pśipinawki se na wašom pśipětem zwězanju pokažo.

   

Zwězanje wótpěś:

1. Gibniśo špěrku nad kachlicku, daniž se meni (tśi dypki) njepokazujo.

   

2. Klikniśo na Wótpěś.

Zwězanje wótwónoźeś:

1. Gibniśo špěrku nad kachlicku, daniž se meni (tśi dypki) njepokazujo.

   

2. Klikniśo na Zachyśiś.

Zwězanja pśerědowaś

Klikniśo a źaržćo kachlicku a śěgniśo ju do drugego městna.

Wěcej abo mjenjej zwězanjow pokazaś

1. Klikniśo na swójom boku nowego rejtarika na tłocašk Personalizěrowaś.
2. Wubjeŕśo we wótrězku Zwězanja z wuběrańskego menija licbu smužkow zwězanjow, kótarež cośo wiźeś.

   

Wót Pocket dopórucony

Pocket něnto k Mozilla słuša a bitujo nejlěpše tšojeńka wó webje za waš bok nowego rejtarika. Wót how móžośo nastawki składowaś, je wótwónoźeś abo je w nowem rejtariku wócyniś. Klikniśo na kategorije, kótarež se na boku nowego rejtarika pokazuju a móžośo samo tšojeńka wuslěźiś.

Tšojeńko Pocket składowaś abo ako cytańske znamje składowaś

1. Gibniśo špěrku myški nad nastawk, daniž se meni (tśi dypki) njezjawijo.

   

2. Klikniśo na meni a wubjeŕśo jadnu ze slědujuceju akcijowu:
   • Cytańske znamjenja składowaś: Dajśo swójomu cytańskemu znamjenjeju mě a wobznamjenja.
   • Do Pocket składowaś: Registrěrujśo se za dermotne konto Pocket abo pśizjawśo se, jolic maśo eksistěrujuce konto.
3. Klikniśo na Dokóńcone, gaž sćo gótowy.

Bok w nowem woknje wócyniś

Cośo se nastawk něnto woglědaś? Móžośo jen w nowem woknje wócyniś.

1. Gibniśo špěrku myški nad nastawk, daniž se meni (tśi dypki) njezjawijo.

   

2. Klikniśo na W nowem woknje wócyniś abo W nowem priwatnem woknje wócyniś, jolic njocośo jen w swójej pśeglědowańskej historiji składowaś.

Dopórucony nastawk wótwónoźeś

1. Gibniśo špěrku myški nad nastawk, daniž se meni (tśi dypki) njezjawijo.

   

2. Klikniśo na meni a pótom na Zachyśiś, aby jen ze swójich dopórucenjow Pocket wótwónoźeł.

Nejnowša aktiwita

Wótrězk Nejnowša aktiwita sedła pokazujo, ku kótarymž sćo se njedawno woglědał, kótarež sćo składł ako cytańske znamje abo do Pocket. Firefox buźo w kuždej kachlicce symbol Pocket, gwězdku cytańskego znamjenja abo zegerowy symbol gatnjejšego woglěda pokazowaś.

Sedło z wótrězka Nejnowša aktiwita składowaś abo ako cytańske znamje składowaś

1. Gibniśo špěrku myški nad nastawk, daniž se meni (tśi dypki) njezjawijo.

   

2. Klikniśo na meni a wubjeŕśo jadnu ze slědujuceju móžnosćowu:
   • Ako cytańske znamje składowaś: Dostanjośo napominaje, mě a wobznamjenja za swójo cytańske znamje zapódaś. Klikniśo na Składowaś, gaž sćo gótowy.
   • Do Pocket składowaś: Jolic njejsćo pśizjawjony, dostanjośo napominanje, se za dermotne konto Pocket registrěrowaś abo se pśizjawiś, jolic južo konto maśo. Gaž sćo pśizjawjony, se sedła ned do Pocket składuju.
3. Klikniśo na Dokóńcony, gaž sćo gótowy.

Sedło z wótrězka Nejnowša aktiwita w nowem woknje wócyniś

1. Gibniśo špěrku myški nad nastawk, daniž se meni (tśi dypki) njezjawijo.

   

2. Klikniśo na W nowem woknje wócyniś abo W nowem priwatnem woknje wócyniś, jolic njocośo, až se sedło we wašej pśeglědowańskej historiji składujo.

Sedło z wótrězka Nejnowša aktiwita wótwónoźeś

1. Gibniśo špěrku myški nad nastawk, daniž se meni (tśi dypki) njezjawijo.

   

2. Klikniśo na meni a pótom na Zachyśiś, aby jo z wótrězka Nejnowša aktiwita wótwónoźeł.
   Móžośo teke na Z historije wulašowaś kliknuś, aby wuzwignjone boki ze swójeje pśeglědowańskeje historije wótwónoźeł.