Z funkciju Filelink Thunderbird móžeće wulke přiwěški do mróčele nahrać a wotkaz pósłać, město toho zo byšće je direktnje k swojej mejlce připowěsnył. Tuta funkcija so přez přidatki poskićowarjow Filelink poskića.

Funkcija Filelink Thunderbird

Wjele e-mejlowych serwerow njeakceptuje powěsće z wulkimi datajowymi přiwěškami. Wobmjezowanje datajoweje wulkosće wariěruje po konfiguraciji e-mejloweho serwera. Samo hdyž móžeće powěsć z wulkim přiwěškom słać, móhł přijimacy e-mejlowy serwer powěsć z wulkim přiwěškim wotpokazać. Thunderbird na to žadyn wliw nima.

Funkcija Filelink Thunderbird tutón problem přez to eliminuje, zo podpěru za składowanske słužby online k dispoziciji staja. Zmóžnja wam, přiwěški k składowanskej słužbje online nahrać a wuměnja přiwěški w powěsći z wotkazom na składowansku słužbu online. Přijimar powěsće kliknje na wotkaz, zo by přiwěšk sćahnył. Jako přidatny wužitk so wulke dataje wo wjele spěšnišo sćelu a přijimaja, a wój z přijimarjom tačelowy rum zalutujetaj.

Móžeće tež Filelink Thunderbird přidatnje k normalnym přiwěškam wužiwać. Móžeće na přikład małe dataje direktnje k powěsći připowěsnyć a Filelink za wulke přiwěški w samsnej powěsći wužiwać.

Zhromadźenstwo Thunderbird je rjad přidatkow poskićowarjow Filelink za wšelakich poskićowarjow k dispoziciji stajił (hlejće podrobnosće deleka).

Filelink přidać

Zo byšće tutu funkciju wužiwał, dyrbiće najprjedy jedyn z přidatkow poskićowarjow Filelink instalować, kaž deleka wopisane. Za někotrych poskićowarjow składowanskeje słužby online dyrbiće snano najprjedy nowe konto załožić abo eksistowace konto za nich konfigurować.

• Klikńće na ≡ > Nastajenja > Pisać > Přiwěški > Dalšich poskićowarjow namakać...
• Wubjerće přidatk poskićowarja Filelink a klikńće na ＋ K Thunderbird přidać.
• Wobkrućće prawa přidatka z wuskakowaceho wokna z Přidać.
• Klikńće we wotrězku Přiwěški nastajenjow (hlejće horjeka) na tłóčatko [Wašeho poskićowarja Filelink] přidać.
• Přidajće informacije, kotrež sej přidatk wužaduje.
• Thunderbird budźe wam namjetować, Filelink za přiwěški wužiwać, kotrež su wjetše hač 5 MB (móžeće tutu hódnotu w samsnym wotrězku změnić), abo móžeće z prawej tastu na normalny přiwěšk kliknyć, zo byšće jón konwertował.

Filelink wužiwać

Hdyž k powěsći dataju připowěšeće a datajowa wulkosć horjeka podatu wulkosć překročuje, budźe wam Thunderbird awtomatisce poskićeć, Filelink wužiwać:

• Klikńće na tłóčatko Zwjazać, zo byšće dataju k składowanskemu słužbnemu poskićowarjej online nahrał.
• Jeli radšo dataju jako normalny přiwěšk připowěsnyć, wubjerće Ignorować.

Po tym zo sće Zwjazać wubrał, budźe so waša dataja w pozadku nahrawać a pokazana zdźělenka budźe so aktualizować na:

Hdyž zwjazowanje je dokónčene – to rěka, hdyž waš přiwěšk je k słužbnemu poskićowarjej nahraty – budźe Thunderbird awtomatisce wotrězk w zdźělence přidawać, z wotkazom ke kopiji wašeje dataje online, hlejće deleka:

Hdyž waši přijimarjo zdźělenku dóstanu, budu samsnu informaciju widźeć a hdyž na wotkaz w zdźělence klikaja, wjedu jich k stronje, zwotkelž móžeće přiwěšk sćahnyć.

Husto stajene prašenja wo Filelink

Přiwěški, kotrež přez Filelink sćeleće, so na serwerach Thunderbird njeskładuja. Kóždy poskićowar słužby składowanja datajow ma swójske prawidła priwatnosće a wužiwanske wuměnjenja. Poskićowar słužby składowanja datajow je funkciju Filelink přepruwował, zo by zawěsćił, zo wona jeho prawidłam wotpowěduje.

Wě Thunderbird, kotreho poskićowarja wužiwar je wubrał?

Ně. Thunderbird njewě, kotreho poskićowarja wužiwar je wubrał. Konfiguracija poskićowarja so lokalnje na wašim ličaku składuje.

Kotre składowanske słužby so tuchwilu podpěruja?

• Rjad woblubowanych poskićowarjow składowanja datajow so přez přidatki poskićowarjow Filelink podpěruje.
• Móžeće tež Filelink z pomocu přidatka Filelink provider for WebDAV ze swojim najlubšim WebDAV-serwerom wužiwać.

Móže sej poskićowar składowanskeje słužby moje přiwěški wobhladać?

Poskićowarjo składowanskeje słužby móža sej dataju wobhladać, kaž kóždy, kotryž wotkaz k přiwěškej dóstawa, chibazo zaklučujeće dataju, prjedy hač ju nahrawaće. Wužiwarjo sami dyrbja rozsudźić, kotremu słužbowemu poskićowarjej tu z tej zamołwitosću dowěrjeće. Słužbni poskićowarjo zwjetša waše priwatnostne prawa w swojich wužiwanskich wuměnjenjach wujasnjeja.

Dźiwajće na to, zo standardna přiwěškowa funkcionalnosć ani zaklučowana njeje. Hdyž přiwěšk na „normalne“ wašnje sćeleće, bjeztoho zo byšće funkcije OpenPGP a SMIME Thunderbird wužiwał, ma kóždy přistup na dataju, kotryž ma přistup na powěsć mjez wašim systemom a systemom přijimarjow (na přikład poskićowarja e-mejloweje słužby). Filelink skići wěstu wěstotu, dokelž so datajowe nahraća k poskićowarjej składowanskeje słužby přez HTTPS, wěsty protokol, sćelu. Poručamy, zo funkcije OpenPGP abo SMIME Thunderbird wužiwaće, zo byšće maksimalnu wěstotu za swoje komunikacije zawěsćił.

Kak dołho budźe moja dataja na sydle składowanskeho słužbneho poskićowarja k dispoziciji?

Wotwisujo wot wuměnjenjow wašeho třećeho składowanskeho słužbneho poskićowarja a wašeho słužbneho dojednanja z nim, budźe dataja na sydle poskićowarja za wobmjezowany čas k dispoziciji, wěstu ličbu sćehnjenjow abo doniž ju na přeco njezhašeće. Dyrbiće so pola websydła poskićowarja přizjewić, zo byšće dataje w swojim wosobinskim składowanskim rumje wobhladał a zhašał.

Móžeće słužbneho poskićowarja X abo protokol Y podpěrować?

Prošu přepruwujće, hač zhromadźenstwo Thunderbird je přidatk poskićowarja Filelink za słužbneho poskićowarja, za kotrymž pytaće. Wuwiwarska dokumentacija za API Filelink je k dispoziciji.

Njemóžu so z mysličku spřećelić, moje dataje pola třećich poskićowarjow kaž tutón składować. Funguja hišće normalne přiwěški?

Normalne e-mejlowe přiwěški hišće kaž přeco funguja. Poskićamy jenož móžnosć, wulke přiwěški něhdźe nahrać, jeli to chceće. Standardna wulkosć wulkeje dataje je 5 MB, ale da so w nastajenjach Thunderbird přiměrić:

1. Klikńće na ≡ > Nastajenja > Pisać > Přiwěški
2. [✓] Dataje nahrać, kotrež su wjetše hač [ 5] MB

Hdyž hóčku wotstronjeće, so awtomatiska zdźělenka Filelink potłóčuje, hdyž wulke dataje připowješeće, ale funkcija Filelink budźe hišće z wuběranskeho menija tłóčatka Připowěsnyć | v kaž tež z druhich přiwěškowych a kontekstowych menijow k dispoziciji.