Tutón nastawk podrobny zawod do najzajimawšich nowych funkcijow, polěpšenjow a změnow skići, kotrež wužiwarjo w Thunderbird 91.0 widźa. Wobšěrniša, ale mjenje wopisowaca lisćina změnow, móžeće we wersijowych informacijach Thunderbird 91 namakać.

Wobstarajće sej Thunderbird w swojej rěči! Witaj letišćina!

Thunderbird 91 je we wjele rozdźělnych rěčach na startowej stronje Thunderbird k dispoziciji a je so wot zhromadźenstwa přełožił. Eksistowace instalacije Thunderbird so w datym času awtomatisce aktualizuja. Nowy: Witaj letišćina jako poslednja přidata rěč!

Prěnje kroki z Thunderbird su lochke!

Njeje ženje lóšo było, wašu eksistowacu e-mejlowu adresu z Thunderbird konfigurować. Nowy: Smy waše zadźěłowanske dožiwjenje zlěpšili a smy zwjazowanje z eksistowacymi protykami a adresnikami online wosnadnili (hlejće deleka). Konto so nětko w rajtarku konfiguruje. Zapodajće prosće swoje mjeno, swoju e-mejlowu adresu a swoje hesło a zwjazajće hnydom!

Jednorje z wašimi eksistowacymi adresnikami online a protykami zwjazać: Podpěra CardDAV a CalDAV a awtomatiske wotkrywanje přidate

Čińće Thunderbird k swojemu wosobinskemu informaciskemu zrjadowakej! Thunderbird z integrowanej protyku, z adresnikom a četowymi modulemi přińdźe.

Nowy: Thunderbird nětko internetne adresniki CardDAV a protyki CalDAV podpěruje. Po tym zo sće swoju eksistowacu e-mejlowu adresu z přijomnej awtomatiskej konfiguraciju konfigurował, Thunderbird na zakładźe podatych wužiwarskich informacijow waše internetne adresniki a protyki awtomatisce wotkrywa.

Hdyž Thunderbird konto Google mail přidawaće, móžeće swoje eksistowace protyki a adresnik Google přidać (hlejće pokazy).

Kontrolujće swoje e-mejlowe dožiwjenje: waše konta, waš porjad!

Pokazajće wšě swoje e-mejlowe konta w jeničkim, přehladnym a wjelestronskim nałoženju. Žane wabjenje, žane slědowanje.

Nowy: Nětko móžeće lochko porjad změnić, po kotrymž so waše konta we wobłuku rjadowakow pokazuja:

• Wubjerće ≡ > Kontowe nastajenja, ćehńće potom zapiski hłowneho konta do požadaneje pozicije.
• Abo wubjerće zapisk hłowneho konta a tłóčće Alt + ↓ abo Alt + ↑, zo byšće porjad kontow z pomocu tastatury změnił.

Mějće swoje najlubše pohlady do e-mejle po swojim dobrozdaću!

Thunderbird wam zmóžnja wubrać, kak chceće swoje e-mejlowe powěsće wot wjacorych e-mejlowych adresow pokazać. Nowy: Móžeće nětko wjacore staplowane napohlady w swojim wobłuku rjadowakow měć a je tak rjadować, kaž chceće - Stajće swoje najlubše na spočatk! Tu su někotre móžnosće:

• Wšě rjadowaki - Pokazajće kóžde e-mejlowe konto separatnje z jeho originalnej rjadowakowej strukturu.
• Zjednoćene rjadowaki - kombinowany napohlad wšěch wašich e-mejlowych adresow, z globalnym póstowym dochadom, rjadowakom Pósłane atd.
• Najlubše rjadowaki - Wy maće wólbu! Klikńće z prawej tastu na někajki rjadowak, wubjerće potom zapisk Preferowany rjadowak z kontekstoweho menija, zo byšće swojim faworitam rjadowak přidał.

Zo byšće napohlady wubrał, kotrež chceće k swojemu wobłukej rjadowakow připjeć:

• Wubjerće tłóčatko Nastajenja wobłuka rjadowakow ⋯ z lajsty wobłuka rjadowakow a zmóžńće swoje preferowane napohlady. Móžeće tež ≡ > Napohlad > Rjadowaki wužiwać.
• Zo byšće swoje napohlady sortěrował, znjemóžnće wšě a wubjerće potom te, kotrež chceće w nawopačnym porjedźe pokazać: Kóždy posledni wubrany napohlad budźe waš prěni napohlad.
• Móžeće přeco swoje wuběry změnić abo je přetworić …

Natiwna podpěra za graty macOS, kotrež su so z Apple Silicon wuwili

Thunderbird je za Windows, Linux a MacOS k dispoziciji. Nowy: Natiwna podpěra platformy za graty macOS, kotrež su so z CPU Apple Silicon wuwili, wulke wukonowe polěpšenja sobu přinjese.

Eficienca, hdźež ju najwjace trjebaće: Polěpšeny adresowanski wobłuk za nowe powěsće

Thunderbird je za to mysleny, rjadowanje wašich mejlkow wosnadnić a eficientniše činił. Wěmy, zo rozdźělni wužiwarjo rozdźělne potrěbnosće maja. Mjeztym zo e-mejl lochku a za kóždeho přistupnu činimy, poskićamy tež eficiencu za předewzaća a rozšěrjene funkcije. Hdyž nowu powěsć pisaće, wupruwujće tute nowe a polěpšene funkcije w adresowanskim wobłuku:

Priwatnosć a škit datow jednorje činjene: Nowe zdźělenje wo zjawnej masowej e-mejli

Nowy: Thunderbird budźe nětko nutřkownu zdźělenku deleka we wojnje Pisać pokazować, hdyž adresowemu polu Komu abo Kopija 15 abo wjace zjawnych přijimarjow přidawaće. Hdyž wjele zjawnym přijimarjam powěsć sćeleće, móže so to přećiwo jich priwatnosći abo prawam škita datow přeńć.

• Zdźělenka staja přihódne akciske tłóčatko k dispoziciji, Schowanu kopiju město toho wužiwać, kotrež awtomatisce wšěch zjawnych přijimarjow do adresoweho pola Schowana kopija přesunje, zo by wobešło, zo so druhim přijimarjam jich e-mejlowe adresy pokazuja.
• Móžeće namjeznu hódnotu ze schowanym nastajenjom změnić: mail.compose.warn_public_recipients.threshold

Nowy wužiwarski powjerch za přidawanje přiwěškow

• Nowy: Přidawanje přiwěškow přez ćehnjenje a pušćenje je nětko lóše, dokelž móžeće je něhdźe w cyłym woknje Pisać pušćić. Za wobrazy móžeće wubrać, hač so maja do wašeho powěsćeho teksta zasadźić abo jako normalne přiwěški přidać.

• Nowy: Wobłuk přiwěškow je so z adresoweho wobłuka wotstronił a dele přesunył, štož widźomnu konsistencu z tym wobchowuje, kak přiwěški nalistujemy, hdyž so powěsć čita.

• Nowy: Je nowa mjezynarodna tastowa skrótšenka za přistup k njeprózdnemu wobłukej přiwěškow a zo by so njeprózdny wobłuk přiwěškow pokazał abo schował: Strg/Cmd+⇧+M.
• Njezabudźće, je tež Strg/Cmd+⇧+A, zo bychu so datajowe přiwěški přidali.
• Sće wědźał, zo móžeće swoje přiwěški přerjadować, po tym zo sće je přidał? Hdyž dwaj přiwěškaj maće, abo wjace, wubjerće jedyn přiwěšk abo wjace, zo bychu přesunyli, klikńće z prawej tastu na jedyn z nich a wubjerće akcije z wokna Přiwěški přerjadować. Móžeće tež přiwěški po jich datajowych mjenach alfabetisce sortěrować. Nimo toho tastowe skrótšenki tež funguja, hdyž akciske wokno je začinjene!

Nowe tłóčatko Tekstowy stil wotstronić a zaktualizowane symbole na formatowanskej lajsće

• Polěpšeny: Je nětko tłóčatko za wotstronjenje kóždeho tekstoweho formatowanje z wubraneho teksta we woknje Pisać. Móžeće tute tłóčatko wužiwać, zo byšće tekstowe formaty kaž tučny, kursiwny, podšmórnjeny, pismowu barbu, pismowu wulkosć atd. wotstronił. Jeli wuběr njeje, so wšě tekstowe formaty wot pozicije kursora sem njewužiwaja. Tastowa skrótšenka za tutón přikaz je Strg/Cmd+⇧+Y.
• Wšě symbole tekstoweho formatowanja na formatowanskej lajsće su so zaktualizowali, zo bychu so lěpje rozeznawali a sej tohodla lóšo spomjatkowali.

Nowa akcija Hinak wodźić za direktne připósłanje powěsće

Nowy: Móžeće powěsć tak dale sposrědkować kaž wona je, ale z originalnym wotpósłarjom, kotrež je w adresowym polu Wotmołwić přednastajeny. Tuta funkcija móže za spěšne dalesposrědkowanje w předewzaćach abo běrowach wužitna być, na př. wot sekretarki do šefa. Wobsah originalneje powěsće tak wostanje kaž je, ale wotmołwy na hinak wodźenu powěsć so awtomatisce originalnemu wotpósłarjej připósćelu.

• Klikńće z prawej tastu na jednotliwu powěsć w lisćinje powěsćow a wubjerće potom Hinak wodźić z kontekstoweho menija.
• Je tež tłóčatko ↠ Hinak wodźić, kotrež je z wokna Přiměrić k dispoziciji:
  

Klikńće z prawej tastu na e-mejlowu symbolowu lajstu, wubjerće potom Přiměrić… a ćehńće tłóčatko do požadaneje pozicije na symbolowej lajsće.

Wužitk bjez kała: Nowy integrowany PDF-čitak

Nowy: Runje tak kaž Firefox Thunderbird integrowany PDF-čitak ma. Tak móžeće prosće připowěsnjene PDF-dataje w rajtarku wočinić, bjeztoho zo byšće eksterne nałoženje wužiwał.

Nowy ćišćerski dialog z integrowanym přehladom a nastajenjemi

Polěpšeny: Ćišćenje je so polěpšiło: Nowy ćišćerski dialog, kotryž je so wot platformy Mozilla namrěł, ćišćenje, ćišćerski přehlad a ćišćerske nastajenja w jeničkim, zjednorjenym wužiwarskim powjerchu kombinuje. Abo móžeće hišće ćišćerski dialog swojeho systema wužiwać, jeli to preferujeće.

Drasty, kotrež so spodobaja: Wubjerće swoje barby!

Thunderbird tři barbne drasty sobu přinjese:

• Systemowu drastu (standard - wona barby wašeho dźěłoweho systema wužiwa)
• Swětłu drastu (na swětlym boku)
• Ćmowu drastu (w nocy woči šonowacu)

Wupytajće ju! Móžeće swoju drastu z mało kliknjenjemi změnić a změny so hnydom wuskutkuja:

≡ > Přidatki a drasty > Drasty, wubjerće potom Zmóžnić za drastu swojeje wólby.

Polěpšeny: Wjele polěpšenjow a porjedźenjow ćmowej drasće, kotraž so nětko na nimale kóždy dźěl nałoženja wuskutkuje.

Postajće hustosć wužiwarskeho powjercha Thunderbird

Nowy: Hustosć wužiwarskeho powjercha Thunderbird da so nětko z třomi modusami z woteběracej hustosću wodźić: Kompaktny, Normalny, Dótk. Dobra nowinka za tych, kotrež z touchgratami dźěłaja!

≡ > Napohlad > Hustosć > Kompaktny | Normalny | Dótk

Jendźelske zapřijeće Options je so pod Windows dźěłowy system přesahowaceje konsistency dla do Preferences přemjenowało

Thunderbird na wjele platformach wulkotnje funguje: Windows, Linux a MacOS. Za Thunderbird na Windows smy jendźelske zapřijeće menija Options do Preferences přemjenowali, zo by menijowa šćežka za konfigurowanje Thunderbird samsna na wšěch platformach była:

≡ > Nastajenja

OpenPGP: Słanje zaklučowanych powěsćow na přijimarjow schowanych kopijow nětko z warnowanjom móžne

Polěpšeny: Móžeće nětko přijimarjam schowaneje kopije z OpenPGP zaklučowane powěsće pósłać. Thunderbird wam warnowanje pokaza, zo to budźe indirektnje wašich přijimarjow schowaneje kopije pokazować. Za wěste scenarije kaž na přikład słanje schowaneje kopije na sebje, mohło riziko pokazowanja akceptujomne.

OpenPGP: Nowe akcije za kopěrowanje ID klučow a porstowych wotćišćow

Thunderbird integrowany zrjadowak klučow OpenPGP za wšě waše kluče sobu přinjese. Nowy: Akcije za kopěrowanje klučowych ID a porstowych wotćišćow su so kontekstowemu menijej klučow přidali.

• ≡ > Nastroje > Zrjadowak OpenPGP-klučow
• Klikńće z prawej tastu na eksistowacy kluč > Kopěrować
• Wubjerće z podmenija Kopěrować mjez Porstowy wotćišć, ID kluča a Zjawny kluč.

OpenPGP: Nowe rozšěrjene nastajenja

Thunderbird zatwarjene zaklučowanje přez OpenPGP abo S/MIME skići. Nowy: Nětko móžeće zadźerženje zaklučowanja z třomi nastajenjemi zhłosować, kotrež su so přidali abo pokazali. Respektujemy, zo rozdźělni wužiwarjo rozdźělne potrěbnosće maja. Jeli zaklučowanje připrawjene njeje, so rozšěrjene nastajenja njewužiwaja a su tohodla znjemóžnjene. Někotre z tutych nastajenjow měli so z kedźbnosću wužiwać, zo njeby so waša priwatnosć wohrozyła.

≡ > Kontowe nastajenja > Waše konto > Zaklučowanje kónc do kónca > Rozšěrjene nastajenja

Protyka: Nowe zdźělenske nastajenja za jednotliwu protyku a globalne zdźělenske nastajenja

Nowy: Nimo dopomnjećow móžeće mjenje nawalnych wuskakowacych zdźělenkow za kóždu protyku a globalnje konfigurować.

• Klikńće z prawej tastu na protyku we wobłuku protykow a wubjerće Kajkosće.
• Klikńće na tłóčatko ＋ Zdźělenku přidać a podajće podrobnosće zdźělenki.
• Wobkrućće dialog kajkosćow z tłóčatkom W porjadku.
• Abo móžeće tłóčatko Globalne nastajenja zdźělenkow… wužiwać, zo byšće zdźělenki za wšě protyki definował.

Protyka a nadawki: Akciji „cofnyć“ a „wospjetować“ za podawki a nadawki přidatej

Nowy: Po tym zo sće nadawki abo podawki wutworił abo zhašał, móžeće tute akcije nětko cofnyć abo wospjetować.

• Strg/Cmd + Z: Cofnyć
• Strg/Cmd + Y: Wospjetować

Chat: Standardny serwer za nowe četowe konto je so do libera.chat změnił

Nowy: Wjeselimy so, libera.chat jako nowy standardny serwer za nowe četowe konta poskićić. Tworja so tuchwilu wot bywšeho teama freenode a skića wabjacu platformu zhromadźenstwa za darmotnu softwaru wotewrjeneho žórła kaž tež projektow, kotrež so wot peera nawjeduja. Libera Chat je darmotny a wuwiwa so wot dobrowólnikow z cyłeho swěta. Četujmy!

Chat: Wobrazowe emotikony su so přez znamješka Unicode narunali

Polěpšeny: Hdyž chceće so z emotikonami zwuraznić, Thunderbird nětko znamješka Unicode město małych wobrazkow wužiwa. Prosće lěpše!

Chat: Porjedźenja a polěpšenja pod hawbu

Porjedźeny: Ličba małych problemow je so porjedźili, a smy někotre wažne změny pod hawbu přewjedli, zo byšće přijomne četowe dožiwjenje měł.

• Chowanje systemowych zdźělenkow nětko zaso funguje, zo byšće móhł na swoju konwersaciju bjez wotwjedźenja koncentrować.
• Četowe kontowe nastajenja so nětko korektnje składuja.

FileLink: Podpěra WeTransfer je so wotstroniła, ale móžeće hišće wulke přiwěški po mróčeli słać

Wjele e-mejlowych serwerow powěsće z wulkimi datajowymi přiwěškami njeakceptuje. Z funkciju Filelink Thunderbird móžeće wulke přiwěški do mróčele nahrać a wotkaz pósłać, mesto toho zo byšće je direktnje k swojej e-mejlowej powěsći připowěsnył. Thunderbird dale podpěru za wšelakich druhich poskićowarjow z přidatkami poskićowarjow FileLink poskića. Zo byšće tutu funkciju wužiwał, dyrbiće jedyn z tutych přidatkow instalować:

• ≡ > Nastajenja > Pisać > Přiwěški > Dalšich poskićowarjow namakać…
• Wubjerće přidatk poskićowarja Filelink a klikńće na ＋ K Thunderbird přidać.
• Wobkrućće přidatkowe prawa z wuskakowaceho wokna z Přidać.
• Klikńće we wotrězku Přiwěški nastajenjow (hlejće horjeka) a potom na [Wašeho poskićowarja přidać].
• Přidajće informacije, kotrež sej přidatk žada.
• Thunderbird namjetuje, FileLink za přiwěški wužiwać, kotrež su wjetše hač 5 MB (móžeće limit w samsnym wotrězku změnić), abo móžeće z prawej tastu na normalny přiwěški kliknyć, zo byšće jón konwertował.

Podpěra za movemail je so wotstroniła

Podpěra za movemail je so wotstroniła. Prošu konfigurujće IMAP- abo POP3-konto město toho, zo byšće přistup k swojej e-mejli měł.

≡ > Nowy > Eksistowace e-mejlowe konto…